(Testo solo in dialetto Parmigiano)
(Il Pagéli di Crozè in djalètt Pramzàn)
Pärma Avelén 1-0
Pavarén òt : ‘na stòrja béle vìssta, al partìssa tìmmid da mat, po’ in fónda al blòca so cuànt balón miga difìccil ma un po’ viljàc. Da cuand è cambjè mister l’é al portér meno batù ädla sèrja B
Castlén séz : L’òmm pù d’espariénsa, l’é stè zbalotè déd chì e déd là par via ädla necesitè ch’ al ‘ne säva njàn lù se cambiär fàsa o cambiär il scärpi ormäj; próva ordinäda sénsa erór e sénsa còzi strepitózi !
Rossi òt : oooh là Marchètt èt vìsst che anca con la crozäda adòs a’t fè dil partìdi cme Dio cmanda ? avanti acsì pramzàn sénsa guardäros indrè orgoljòz e codìggn
Falcón nóv : la pù béla partìda da cuand l’é a Pärma, ätor che ai Bòsch äd Carèga, al rapace al voläva al Tardini jér dòp mezdì
Troest nòv : vèddot al destén ? l’ ha zughè par via äd l’emergénsa l’ ha catè al gòl al s’è zblochè e äd tésta l’ ha dominè la partìda, ch’ l’é la còza ch’ a sarvìva äd pù jér ! risposta da
profesjonìssta…da aplaudìr
Antonéli : ansi Altobéli cme j’ al ciàmon còj ädla béla etè fóra dal stadio ! Elóra d’óra inànz a’t ciamarämma tùt Spillo parchè còj ädla béla etè ì gh’ han sémpor ragjón ! Gran partida incó Spillo complimént !
Bùdel séz : ‘na partìda äd cuantitè, miga tròp lùccid, anca sfortunè parchè col tìr dal secónd témp l’éra gol sèch s’al né piciäva miga in-t-na gamba äd vón lì par cäz
Mariga séz : ‘na suficénsa par n’é ruvinär miga la média, mo che terór tutt il vòlti ch’al gh ’ha la bàla in-t-ì pè j’én séz méz äd vita in méno par tùtt; a chilù a gh’ vól fat la pista d’atlètica dintórna al camp, ètor chè
Morón déz : a Stefano a gh’ vól fàt al tatuàg’ äd la crozäda ätor che ! mò l’ ìv vìsst in fónda che grénta, s’ l’avìss podù tant ch’al zugäva l’arìss cantè anca i còri äd la curva ! un gran capitàn !
Reginäld séz: pù che braziljàn un zvedés, cualitè poca poca, ma tanta cuantitè e tanta vlontè dónca suficénsa e un cuälch aplauso anca p’r al balarén !
Paloschi séz : stés idéntich gudìssi äd Reginäld, dailà lòmo a’t pär un po’ zò moralmént dai ch’a’t spetèmma ch’a’t gh’è da fär di gol anca tì p’r andär su
Guidolin déz : ‘na gestjón äd necesitè e-ce-sjó-nä-la ! Bravo Don, t’è imbrochè al binäri giùsst, avanti con cälma che in stasjón a gh’ rivèmma tùtt insèmma in fónda al vjàz ! Pochi bàli pochi paròli e tanta lèggna, costa chi l’é la génta ch’a piäza a Pärma
Pùbblich séz : s’t’an’ la va méj in trasfèrta che in cà, elóra provèmma andär a Pisa in tant, tant, tant ? dai ch’ l’é ora äd bàtor al fér tant ch’ l’é cäld ! AVANTI CROZÈ IN MAJA CROZÄDA !
(Tgnèmmos vìsst)
(Testi di Crociato 63 supervisione ortografica di Enrico Maletti)
Post
Nessun commento:
Posta un commento