"Al Condominni" poesia brillante in dialetto parmigiano di Bruno Pedraneschi,letta da Enrico Maletti

Estratto di un minuto del doppiaggio in dialetto parmigiano, realizzato nell'estate del 1996, tratto dal film "Ombre rosse" (1939) di John Ford. La voce di Ringo (John Wayne) è di Enrico Maletti


PARMAINDIALETTO Tv


Tgnèmmos vìsst
Al salùt pramzàn äd parmaindialetto.blogspot.com

“Parmaindialetto” è nato il 31 luglio del 2004. Quest’anno compie 16 anni

“Parmaindialetto” l’é nasù al 31 lùjj dal 2004. St’an’ al compìssa 16 an’

Per comunicare con "Parmaindialetto" e-mail parmaindialetto@gmail.com

L’ UNICA SEDE DI “Parmaindialetto” SI TROVA A PARMA ED E' STATO IDEATO DALLA FAMIGLIA MALETTI DI “PÄRMA”.







martedì 16 agosto 2011

L' Editoriale del Direttore Giuliano Molossi sulla "Gazzetta di Parma" del giorno di Ferragosto tradotto in dialetto Parmigiano.

(Testo solo in dialetto Parmigiano)
Editoriäl -

Berlusconi “bagolón”

l’à tradì al céto normäl -
Di Giuliano Molossi
Traduzione in dialetto Parmigiano di Enrico Maletti

L’é un Feragòsst amär bombén par parècc’ italjàn, vìttimi äd ‘na manovra odjóza e ingiùssta ch’ l’à colpìssa sol i lavorator dipendént ch’ i vìvon dal pròprj stipéndi e ch’ i pägon inzamò il tasi fin a l'ùltom evro.
Al contribut äd solidarietè (i gh’ àn avù al bècch äd fér äd ciamärol acsì) al pezarà sui cojón, i solit bón ragas, còjj ch’ j én spremù cme di limon, e l’à ‘n struzarà mìga i fùrob, ch’ i lavorator autònom che, pur dichiarànd molt meno äd 90 mìlla evro a l'an’, i s’ fan vèddor, sénsa vargòggna, con dìl fuorisérja, cà, bärchi.

La manovra l’ à ‘n tòcca mìga gnànca il richèssi finansjäri e còlli immobiljäri. A s’ salvaguärda il renditi e i grand patrimónni e i s’ acanìsson sui rédit, sénsa capir ch’ j én pròprja còssti chì a fär girär l'economja. A colpir i rédit, e in-t ‘na manéra acsì violénta, a ‘n s’ pénsa mìga ch’ a s’ bùtta zò i consum. Al popol di tartasè al dovrà rinuncjär a ristorant, vjaz, divartimént. Berlusconi, patétich, al diz che al sò cór al pìssa sànngov p’r ésor stè costrètt dal circostànsi ad aumentär ilj odiädi tasi. Béli bàli. Berlusconi al n’é gh’à mìga ‘n cór . S’ al gh’ l’avìss al n’è s’ acanirìss mìga contra al céto normäl, al cuäl al gh’ l’ à da ringrasjär par la gran pärta dal sò sucés. Al céto normäl al gh’à pardonè tutt. Al gh’à pardonè le Noemi, le D'Addario e le Ruby. Al gh’à pardonè il légi ad personam, mo al n’é podrà mäi pardonärogh còll fùrt chì, parché còsste chì l’é un furt.

Berlusconi l’é un bagolón

L’ à contè dil bàli al Paéz. L’ à dìtt ch’ al n’arìss mäi mìs il màn in-t-il sacòsi a ilj Italjàn. Invéci al l’à fat. L’à mìs, ànsi l’à afondè il sò màn in socuànt sacòsi, mìga in tùtti però. E còsst ch’ l’é ancòrra pu gräv parché, a ch’ la manéra chì, al s’é réz responsàbil äd ‘na gräva ingiustìssja. L’é dal '94 che al premier al s’tóz p’r al cul a promèttor l'abatimént ädla presjón fiscäla p’r il famìj e par ilj imprézi. V’arcordìv al fortunè slogan «méno tàsi par tùtti»? A j anunc’ a ‘n’é mäi seguì i fat. L’é dal '94 ch’ al s’conta la fòla dil trèj aliquoti. L’arìss podù fär tutt il riformi fiscäli ch’al vräva prìmma che la crìzi economica la podìssa impedìrgol, mo a n’é mìga stè acsì. Adésa infìnna un schieratìssim giornäl äd centordéstra cme «Libero» al gh’à zbrajè, in-t-un tìttol a tùtta pagina, «Tradimént». Berlusconi l’à tradì al céto normäl.

E al céto normäl al l’à punirà e al l’à mandarà a cà. Cuälchidón al podrìs obietär che ch’la manovra chì l’é städa «caldegjäda», dzèmma acsì, dala Bce, ch’ l’à vräva mizuri bén pu incizìvi äd còlli ch’j éron städi recentemént prezentädi dal govéron. Cuälchidón al podrìs anca fär notär che la crìzi l’é mondjäla e l’a ‘n riguärda mìga sol al nòstor Paéz. Cuälchidón , ala fén, al podrìss zontär che, tutt somè, Berlusconi e Tremonti, pur con cuälch contrast äd pónt äd vìssta, j én stè àbil a mantgnìr al rigor di cónt pùbblich. Tutt vér. Mo còsste chì al n’è mìga suficént par pardonärja ädla «porcäda» äd Feragòsst ch’ l’ arcorda sèrti trìssti manovri ädla vécja Dc.

Anca alora, ala facia äd l’imparsjalitè, a s’ bastonäva sémpor sol còlli che il tasi j a pagävon inzamò. Mìga parchè i fùsson pu onést äd ch’ j ätor, mo semplicemént parché, i gh’ävon la ritenùda ala fonta, e in podävon mìga evador njàn si vrävon. E l’é sémpor lì che al Stät al va a tór i soldi cuand al n’à bizòggna, parché l’é lì ch’l’é sicur äd catärja. E acsì anca incó tutt l’é insìmma al spali äd còll méz miljón äd parsón’ni ch’al dichiara pu äd 90 mìlla evro. Mo al n’é mìga vargognóz che in Itàlja sol un italjàn su sént, ai fén di versamént Irpef, al dichiara un rédit superjor ai 90 mìlla evro a l'an’ ? A n’é mìga vargognóz che j evazór, sicur äd l'impunitè, i vàgon in gìr su di Suv da 150 mìlla evro pur dichiarand un rédit déz volti inferjór al valor äd l'avtomòbil? Có al fat al govèron Berlusconi par combator n'odioza evazjón fiscäla che in Itàlja l’é dòppia rispét al rést äd l'Europa? E indó éni, in-t-la manovra, i tajj ala spéza pùbblica?

E il sforbzädi ai privilég’ ädla Casta? E il tanti atézi riformi struturäli? A pärta la prevìssta cancelasjón äd 29 Provinci e l'acorpamént di Cmón pu picén, i tajj ala polìttica i s’ tradùzon in tajj a j Ent locäjj ch’ i saran costrètt a intarvgnìr su i sarvìssi esensjäl, da l'asisténsa ala sanitè a j azilo nido. Insòmma, n'ätra bastonäda ai citadén.
A còll pónt chì có pólol fär al pòpol di dipendént a rédit fìss, masacrè da còll preljév chì mìga giùsst e forsè? Pòchi mo significatìvi còzi. La prìmma: preténdor sémpor e da tutt (liberi profesionìssti, comerciànt e artigiàn) faturi e scontrén. La seconda: al pròsimi elesjón a ‘n votär pu par chi partì ch’ j àn rovistè in-t-il sò sacòsi, con al rizgh, tutavia, che j ätor partì, sòtta a còll pónt äd vìssta chi, i pólon ésor infìnna péz.
Bón Feragòsst a tutt i tartasè.
Tgnèmmos vìsst

Leggi il testo in Italiano su
www.gazzettadiparma.it
www.pramzanblog.com

Nessun commento: