(Cliccare sulle foto per imgrandirle)
La correzione ortografica del dialetto è di Giuseppe Mezzadri.
DÉDLA DA L’ACQUA ‘ZVÉN AL TÒRRI DI PAVLOT
………………………………………………………………………………………………………..
L’é ormäi soquant ani che chi in famija...e po anca st’ an’ e regolarmént in fagotón
j èmma organizè la consìggna ‘dla scarpètta d’ora...una béla anca se recenta trädisjón
J ävon za premiè un giornalista un regista un vèscov e po anca un gran cantant
E anca st’ an’ chi j èmma strolghè quél par sarnirni in-t-un ciop äd papabil ...vón soltant
St’ an’ a vrävon sarnir un parsonàg’ particolär da podér chi, sta sira, prémièr
Vón ch’al raprezentiss l’identitè pramzàna autentica e ‘csì a són andè quindi a sercär
in méza a tant giudissi…opinjón…articoj .. idéi … pagini scritti… su la nostra parmigianitè
Fat da ‘‘dla génta chi gh’ävon la paténta giusta par giudicär Ste particolära identitè
Cme Baldassarre Molossi,..Giorgio Toréli, Egisto Corrädi …luca Goldoni e Giovanén Guarèsch
E po anca tant’ätor cultór ‘dla parmigianitè che certamént a Pärma i n’ àn certo bvu pu che do mèsci
La parmigianitè l’é cme ‘na sorta äd suppa ingléza…con di prég...e di difét tutt bén armescè
Con ‘d ingrediént mólt genuén e bón da mat…e ‘d j ätor po purtrop scadù..parchè inquinè
La parmigianitè j àn ditt anca ch’l’é cme un mass äd fjór ...d’ogni tipo ..colór ..profumm e varietè
A gh’é di fjór spléndid…mo po anca còj pasì e po cój spén…sèmma sincér l’é la vrìtè
Però j én tutt di fjór e arbasi carsudi naturalmént e concimädi chì in-t-la nostra Pärma tutt i dì
J én l‘éspressjón autentica dal nostor teritori e äd chi pramzàn ch’ j àn sémpor vissù chì
Un po äd chil ravizi li naturäli e po genuén’ni sperèm’ma ch’agh nin sia almeno un po restädi
anca se però al benésor al consumizom e la globalizasjón i si àn un po certo ruvinädi
Soquant di fjór j én la generozitè, ésor ribél, genuén , protagonista, cordiäl, individualista e un po téaträl e po anca scètt, polemich, conviviäl, brìlant, umàn, simpatich e po anca mólt musicäl
Quand a m’ son fermè a riflétor su tutt Ste soquant agetiv ch’a descriväva la nostra parmigianitè
La scelta dal personagg da premiär stà sira sénsa tant indumiär l’é gnuda acsì pràticament äd so pè
Sa ghé un pramzàn che con tutt Ste aspètt la bocè cèrto giust e cmei dizon la fatt filott
E cal ghjà dentro quèsi tutti…pochi bali ragass ….. l’é sicurament berto miclott
Visst ch’a vrävon prémiär l’alma e anca al stamp originäl ‘dla véra e autentica parmigianitè
Berto Miclott tutt stì ingrediént äd la famoza suppa ingléza al gh’ j à äd sicur déntor bén stampè
Berto l’é nassù dal novsént trénta dédla da l’acqua propria al témp äd quand
A gh’éra in chil zoni li ‘d j antifasista …di maganprét e …di gran pramzàn ruspant
L’é nasù in-t-i bórogh sénsa tant simitón in méza a génta sémplice… povrètta véstida po äd mizéria
Mo in do’ l’amicisja … la condivizjón … la solidarietè …e la dignitè…j éron na coza séria
E cme tutt coj che po da chi ..l’é dvintè important e j én dvintè ….po un quälchidón
Al s’é tirè su il manghi e con ‘dla gran fadiga e sacrifissi al se po fat su un futur pu bón
Ste pingalón biond con un coragg e bèck äd fér da vero e batagliér antigh pramzàn
Al sé fat rispetèr sempor da tutti e in ogni occasiòn dopa in gan slònghè tutti la màn
Parchè al ga na dote che in molti ormèi incòn …purtropp i sén quèsi definitivament scòrdè
L’é vòn cièr cmel’acqua äd sorsia e l’ipocrisia da sempor lu al na mèi certo pratichè
Berto cmè arbitro famos l’é stè praticament n’ambasciädor dal nostra gran bela citè
Con un fiscén in bocca ….la stràjè pràl mond …. ‘dla simpatia e po ‘dla gran cordialità
Certo arbitrèr bén e imparsialment con competenza coragg e cmè as dis po acsì con sentiment
I gan tirè sempo a drè de tutt un campionari complét äd parolasi e ofesi brutti e po anca djàcident
Mo berto al né se squasäva gnàn …. al né se mäi sentì su la so péla tutta… ste pressión
Lu al dvìntäva sórd a tutti ste ofesi e a j acidént e l’éra concentrè sól sul balón
Lu pu che Nerone la incendiè Romma e anca i Romàn …che pr’ un rigór i gh’ vrävon fär la péla
E Boninsegna äd l’Inter ch’l’à po sgnè al gol..al gh’à sbràjè “ di Berto t’l’è combinäda béla”
Certo che fra tutti ilj óri ch’l’à pasè … in officina… in compagnia o in gir suj camp da balón
Berto in ca sòvva i l’an visst äd parsón’na äd ciär…un po in fotografia e un po in televizjón
Però a pens che äd sicur almeno do volti …un quälch minud in ca al se sia pur un po fermè
Visto che la sjora Laura …so mojéra …do béli putinén’ni…Sonia e Vania la gh’à po sfórnè
Ansi a propozit a vrèmma fär ‘n’omag’ floreäl e po premiär anca to mojéra si certo anca propria le
E derogh al “premio Giobbe” cioè l’oscar ‘dla soportasjón …par tutta la pasénsia ch’l’à portè
A stär ‘na vitta intréga … ataca a n’òmm …acsì vulcanich.. e dzämol pur un po particolär
In dòvva an sera mèi sicur…. che al fuss si o no…. a la sira in ca con lè a magnèr
Certo bizòggna dirol p’r onestè …an te mäi córs al risc … ch’at dìss ados la ca
E le ..to mojéra …tutti il volti la t’à ‘spetè … sperand äd vèdrot… e cost povrètta sóltant l’é l’al sa
Crèddom Berto….. se to mojéra l’avìss avù … an le un fiscètt par fisciär dil punisjón o di rigór
L’àriss ditt sicuramént l’altoparlant dal städio “dirige Laura Michelotti da Parma…con amór”
Par cosst almeno un tochlìnén de ste scarpètta …. acsì tanta béla .. e po anca …tutta d’òra
A t’ la dovriss dividor con le … par ch’l’à porsjón äd vitta .. ch’l’à pasè a spetärot quand tér fóra
L’é véra ...che ti at si un patrimonni äd simpatia… da dividor… con tutta la citè
Parchè l’é äd sicur che it reclamon da tutti il pärti e costa bizzogna dirol ….l’é la vrìtè
TV Parma, grupp spórtiv, manifestasjón benéfichi, incontor d’ogni tipo e al ciop di melomani di vintisètt Presentär al to libbor , dil serädi in cómpagnia ‘d j amig e infin’na fär scóla äd dialètt al liceo e a San Bendètt
Certo che se it dovisson premiär par tutt col ch’at fè ancòrra in gir …agh vrìss par ti miga ‘na scarpètta d’ora acsi picén’na…mo certamént ‘na fluta nummor quarantott o zo dédli
It ciamon ancòrra cme méstor finn a Coverciano in dòvva i t’ ciamon Michelotti al docént
Parchè il sàn che ti a ne t’cónt migh dil bali… cme i fàn in tanti sénsa pu dignitè e sentimént
La to laurea a t’l’è ciapäda … gioron par gioron… sia in oficina che su tutt in camp da balón
Con ‘dla vlontè …. coragg … franchèssa … disponibilitè e po ‘dla determinasjón
Berto la vissù la gioventù in oficina a trambucär….in méza a di carburatór, dil bjéli e dil frsjón
E la mucè do man certo miga da pianista o violinista mo grandi e robusti….. cme du badilón
Ma il so man j én la so pu béla testimoniansa ‘d n’autentica vitta intrega visuda fra lavór e po onestè
J én grosi… con soquànt call vécc da tutta la fadiga fata ..magari strachi.. mo ch’in s’tiron mäi indrè
Te t’si fat …’na béla scorsa robusta.. che po in-t-la vitta la t’àa certament sémpor compagnè e premiè. Ch’la s’ podrìss sintetizär in fónda…. in fónda.. cme ‘na granda e po profónda umanitè
Par ti …..l’amicissja…. vréros bén … la solidarietè e där ‘na man ….a chi è pu zlipè
La n’é miga äd sicur ‘na fadiga …la t’ vén spontaneamént ….parchè l’é cme ‘na to necessitè
A Pärma è pasè äd moda un sach äd cozi .. di parsonagg’… e po anca dil divärsi situasjón
Mo vón cme ti ….al sta sémpor a gala cme l’oli bón ….e pénsa at si äd moda ancòrra incón
Quäl él al to segrét ..forsi la notorietè..la simpatia..o dir sempor in-t-i dént la to vrìtè
Sécond mi at si restè ….vón äd chi poch ezemplär e déstimonni …äd còlla chi ciamon autenticitè
Ai giovvon a t’ ghé piäz … bombén l’é véra … parchè a t’ si restè vón scètt dirét e po sincér
Che sénsa ..tanti cianci . cerimonji ..tintognamént al diz sénsa reticénsi po in dialètt al so pensér
Certo in saràn miga tutti dil pärli äd sagessa o dil vrìtè asoluti cme i dizon cärt profesór o sperimentè
Mo ésor sémpor ti acsì istintiv, vér, naturäl, l’é ‘na coza ch’la ne s’cata miga incó da tutt il pèrti
At gh’è al coragg’ dil to opinjón anca se ‘s capissa in saràn miga sémpor probabilment il pu giusti
Mo j én frut äd col ch’a t’pénsi ti…. e la to ésperiensa antiga…. La t’diz ch’ j én dil vritè robusti
In-t-un mónd ormäi tutt virtuèll artefatt … sensa pu personalità.. idei slànc e sentiment antìg
Ti at crèdd ancora fortunatament ….a ch’l’à richèssa clé averogh d’atorna ancora un mucc d’amig
L’é par cost che a j occ äd tant pramzàn ti a t’ si restè ancòrra cme un adolescént e un ragasén
Ch’al pénsa ancòrra al di d’incón forsi ingenuamént…che la coza pu importanta la sia… vréros tutti un po pu bén
Cardìmm a mi ragas...fin ch’a gh’nin .. résta un tochlnén dal me amigh... Berto Miclot
Nasù dal milenovsént trénta …dédla da l’acqua… avzén al tòrri di Pavlott
Pärma la so citè d’origine … la sarà ancòr bén raprezentäda e a väl sicur propria dabón
Da Sté generoz amigh simapatich amigh äd tutti che i ciamon con afét con al strànomm äd baracón
Si l’é véra al so che ti….a né t’oféndi miga a séntirot ciamär al conte baracón.
Parchè tal riconos an ti… e mólt onestamént ch’at si un …vero e propri estrat äd confuzjón bizzogna
Ti cme i dizon in mólti… chi t’àn conosù bén da avzén e da tant témp at si dabón un omm dóls e po vón ala man. Barachér .. otimista .. démocratich conviviäl.. äd sicur gustoz cme un pastisén äd marsapan
A né t’ gh’è miga certo al stàmp d’un lord ingléz…o äd chi nobil ch’a gh’éra in-t’n ätor témp
At si un’impulsiv certo sénsa etichètta .. mo vón ch’l’é prónt a där n’aiut a tutti e po in ogni momént
Berto cme a s’ diz …l’é vón ch’al canta fóra dal coro… e ch’al ragiónna ancòrra incó con al so sarvél
Dil volti l’é véra al sbanda un po …parchè agh scapa la frisjón.. mo a ‘scoltärol l’é sémpor un piazér
Berto l’é un’omm sémplic … sénsa tant bigordi e con ‘na personalitè sicuramént fraterna
S’at ghé piäz al té brasa e al té dà la so amicissja ..mo s’at ghé rómpi il scatli al té manda in-t-la Pärma
Al gh’à al stamp antingh da véro tipich autentich pramzàn dal sas certo ruspant e un po genuén
Cme ‘na bocia äd lambrusch o äd malvazia äd colli bónni ch’a s’ béva cme ‘na volta in-t-i scudlén
L’é vón orgoljós al né vrìss pärdor mäimo gnanca quand al suga a cherti
Anca s l’è fortunè da mat...as sénta dal gran odór äd bruzè s’al pärda ..dal so pärti
Berto l’é immortäl .. la soca.. basta vädrol… l’é äd còlli antighi robusti cme ormäi s’nìn vèdda pu
Mi a n’ò mäi visst vón … che a otantón an’…. l’é pién äd vitta e ancòrra po äd progét cme lu
Al gh’a ancòrra ‘na gran vója äd fär …po de tutt al vrìss sémpor .. quél äd nóv sperimentér
Ogni proposta la va bén… par stär in compagnia .. a fär do ciac’ri e po magari baracär
Anca s’al gh’a al bècch äd fär äd dir…. Ch’al gh’à ala sira a bonóra…. ‘na sorta äd coprifuoco
S’al vé diz ch’al va a ca sémpor a bonóra …. cardigh miga al l’à diz acsì cme schärs par zugär
Bizzgna però cära al me ragasus .. ch’a tè t’dagh adésa ‘na calmäda e mètross un po a stechètt
Basta di ganasén… ‘dla buzeca d’j anolén …salam po bomba äd riz…. e po vén scètt
Va bén avérgh un fisich da vichingo e po anca un stomogh ch’al digerìssa fina al fér
Ma pénsa ch’at si miga pu un gionvot... su dzämmol… p’r onestè Berto sèmma sincér
Ti ch’a tè fat al mecanich da camion…. anca äd coj bén robust ..cme gh’éra al vécc’ Trì Ro
T’al sé che dopa un sèrt chilometràgg’ … sert sfors e salidi.. i ne s’ polón pu fär… propria no
S’at gh’è ancòrra dal fiè …par fisciär ‘na punisjón o anca soquant ….sacrosant rigór
Conténtot äd denunciär ..scètt e nètt su la gazètta äd Pärma coj che in citè j àn fatt di brùtt lavór
Ti fortunatamént at’ gh’é miga da stär schìss e po mediär cme gh’à da fär al profesór Mario Monti
Tè t’ pól parmèttor ancòrra d’ésor Berto Miclott e dir tutti il to vritè pu pézi e anca pu bzónti
Continua a cantär con nojätor in compagnia …il nostri béli cansón in dialètt…su Berto dam la nòta
Di scariolant …. ‘dla rondanén’na ….di magnagat e po äd barciolòn felice notte
Adésa tirèmma su tutti al bicér e fèmma un brindizi sincér a sté nostor bél gionvott
Fèmma fésta e fèmmogh j avguri äd salute e äd longa vitta…. al nostro festegè Berto Miclott
E adésa par piazér fam un régal …. vénom chi a brasär ….ch’a posa dir a me anvodén’na admàn
Veronica gh’ò vu al previlég .. l’onór… e po al piazér äd brasär ..su jér sira vón ‘d j ultom pramzàn
INNO AD ALBERTO MICHELOTTI SCRITTO SU DI UN MOTIVO DELLA MUSICA DELLA RIVISTA AMERICANA DEGLI ANNI TRENTA “JUST GIGOLÒ“
Al me amìgh Miclot …l’é pasè pu che un stracot
Mo al pära ancòrra un bél gionvot
Lu l’é un tipo stran ..un vér ruspant pramzàn
Cme i dizon äd coi dal sas
L’é certo un tipo scètt e biónd cme j én i tognètt
Con un gran bècch äd fér
Un gran arbitro dabón….coragioz cme un véc’ león
Su tutt i camp dal mónd
……………inciso
certo al n’é miga mutt
parchè al ciciara sémpor dapartutt
par lu ogni coza l’é un derby
spól dir ch’l’é dapartutt cme j én il bonjärbi
…………………….seconda parte
il ciamon baracón ..parchè äd sicur dabón
l’é cme n’éstrat äd confuzjón
agh piäz baracär e po anca becär
parchè al gh’à un fizich ecesjónäl
lu l’é li a otant’an …visp e viv cme un grìll
roba da fär invidia
ai ragas dal dì d’incòn ch’j én pu vécc’ che lu dabón
parchè in gh’àn miga al so spirit
………………inciso e finale
un pramzàn i t’àn badzè
a t’ si al prototip ‘dla parmigianitè
grassja d’ésor gnu chi
Berto t’ sì stè premiè..si propria ti
bècca la to scarpètta e fnimla ch !
Giorgio Capelli Settore dialetto Famija pramzana
(Le foto sono riferenti alla serata del premio "Scarpètta d'ora" 2012 consegnata ad Alberto Michelotti.)