Il Pagéli di Crozè in Djalètt Pramzàn. Testo pubblicato sulla Gazzetta di Parma del 27 aprile 2012

                                                                                                                                      

Realizzato da Pietro Maletti

(Testo in dialetto Parmigiano)

Palèrom Pärma 1-2

Mirànt  déz : in-t-al prìmm témp dò parädi par tgnìr su la baràca, in-t-al finäl n’usida spetacolära a sarär su tutt ! Anca ti cme la scuädra in gran voläda ! Avanti acsì ch’ a s’ pól rivär indò s’ insognävon gnanca

Biabiany déz : un gol ala Beccalossi e scuza s’ l’é pòch par vón che pu che i pè da Beccalossi, al gh’ à la corsa da Carl Lewis

Santacróza sèt : al prìmm témp l’éra da zéro e anca meno, mo al bél vót l’é stè parchè a té t’ si arpiclè ala granda e in-t-al finäl a t’ si saltè fóra cme un león !

Zacärd déz : al vót l’é p’r incoragiamént e parchè a t’ comìnc’ arcordär che ti a t’ gh’è da fnìr la carjéra a Pärma, azvén a cà, ambjént trancuìll, insòmma sta miga andär a sarcär dal frèdd p’r al lét da n’ätra pärta valabén ?

Lucaréli déz : montè su a frèdd, zbaljè gnanca ‘na virgola, acsì cme gh’ à da ésor p’r un veteràn cme ti !

Modést séz : pròprja parchè dòpa ‘na vitòrja acsì béla a ‘n vój där gnanca n’ insuficénsa, parchè la dormida sul gol l’é da camp nùmmor sèt  äd Fognàn, pròprja còll indò va a zugär j’amator pu gram

Palètta déz : in-t-al prìmm témp a t’è tochè fär tant straordinäri par cuatär Santacróza che adésa rivrà l’ufìssi dal lavór a fär un control, second témp sémpor concentrè e convìnt, un gran bél giron äd ritóron

Jonathan déz : a torni a dir ch’ a gh’é d’andär da Moratti a färogh firmär la comproprietè prìmma ch’ a vaga trop su al prési parchè chilù l’é bón e mìga poch

Valdes déz : da centormediàn ala Pin n’ätra partìda cój barbìz, e socuànt scalädi a fär la diagonäla da cuärt difensor cuand a sarviva in-t-al finäl ! Sa t’ avìss catè Donadón socuànt an’ fa chisà che carjéra t’arìss fat

Morón vìnt : a Morón da capitàn a gh’ dagh al vót dòppi, anca parchè tutt j’én sémpor pront a criticärol, mo jerdlà ch’ l’ à fat ‘na partìda strepitóza in pòch i l’àn fat notär

Galòpa séz : béla partida anca par ti Rito, però sérca ‘d tirär su un pò al témp dailà,  a gh’é da balär la samba chi csì, mìga al bal dal matón

Giovinco déz : cuand al zuga acsì l’é al pu fort zugadór italjàn, un piazér p’r j’òc’, delisjóz e concrét, un gran zugadór, sperämma in-t-al miracol, ch’ al pòsa avér la crozäda adòs anca st’ an’ ch’ vén

Okaka déz : l’important l’éra casärla déntor, e ancòrra pu important l’éra andär a ringrasjär còj ch’é rivè fin a Palérom par stärv atàca, bravo Eddy a t’ si ‘drè  muciär di béj vót par la pagéla ad zùggn

Donadón déz : in parténsa socuànt sèlti un pò dzämma “naif”, mo ‘na gran coresjón äd l’asét ädla scuädra in corsa, ch’ l’é ‘na dote fondamentäla par n’alenadór! Second mi Mìsster a Pärma a s’ pól fär cuél äd bél insèmma, dai dai ch’a gh’ provämma dai !

US Barbiano Calcio trenta e lode : pòsja robär socuànt rìghi par där al vót ala “me Socetè” ch’ l’ à m’à vìsst “där spetacol” par cuindz’ an’ e ch’ l’à festegè marcordì i trént’an’ dala fondasjón, trént’an äd calcio amatorjäl, d’amicìssja e Sport con la S maiùsscola in camp e cój pè sòtta ala tävla, grasja in particolär a Tilio Basteri, al Sir Alex Ferguson ädla ValBagansa ai so aiutant dal Circolo la Quercia e ai pu äd dozént zugadór ! AVANTI BARBIANO E AVANTI CROCIATI

(Tgnèmmos vìsst)

(Testo di Crociato 63)

(Correzione ortogtafica a cura di Enrico Maletti)