"Il Pagéli di Crozè in djalètt Pramzàn". Siena - Pärma 0-0 Testo pubblicato sulla Gazzetta di Parma del 9 aprile 2013.

 

 

 

 

 

 

 

(Testo in dialetto parmigiano)

Siena Pärma 0-0

Mirànt sénsa vót : e du, jerdlà almeno a té t’ si sughè da tùtta l’acua ch’ a t’è ciapè col Pescara, però adésa l’é fnìda la cucagna, domenica con l’Udinéz la cambia anca se sénsa Di Natale i pèrdon la metè ädla fòrsa davanti

 

Biabiany sìncov : e insòmma, o t’ la pas un second prìmma, o un second dòpa, o méz mèttor avanti o mez mèttor indrè, girlla e mèzzdla cuäzi mäj un lavor fat da razón da l’inìssi ala fén

 

Benalouane sètt : fòrsi al Siena l’é ancòrra pu mäl che al Pescara davanti, a tutt il manéri a sì sèmpor stè aténti sénsa gnanca färos gnìr di gran tremlón

 

Palètta déz : al vót l’é parchè t’é rinovè al contràt ! Vót vèddor che se Dio vól  l’à capì che la so dimensjón giùssta l’é Pärma e al né sérca mìga al frèdd p’r al lét ( o méj al frèdd p’r il banchén’ni indò facilmént al s’ podrìss sédor ) ! Bravo lòmmo avanti acsì

 

Lucaréli nóv : gran partìda, specialmént p’r un pär d’ intarvént vón contra vón ch’ j én stè decizìv, e tutt do il volti a t’ si gnu fóra con la bala al pè cme fäva ‘na volta Beckenbauer ( e scusa al paragón )

 

Gobbi sètt : ormäj con Massimo l’é un dìssch ch’ a mètt su tutt il fésti, jerdlà in pu n’assist spetacolär par Sansón che ‘na volta tant al n’é mìga stè spietè ! Col ragas chi l’é n’ezémpi äd profesjonalitè da fär vèddor in-t-il scóli calcio

 

Paról séz : Tato, col ciùff lì, o t’al tàj o té t’ fè ‘na grèssta col gèl cme Rosi o n’al so miga còza, mo stròllga fóra cuél parchè cuand al t’ và in t’ j òc’  la và  fnìr tutt il volti ch’a t’ ciap un cartlén o a t’ pärdi al balón ! Valabén ??

 

Marchionni séz : Marchino a té m’ paräv me fjóla jerdlà, al mìnnim indispensabil par ciapär séz, gnanca ‘na virgola in pu! Al compitén, cartlén timbrè e andèmma su par ch’ l’ ätra ch’ a gh’ sarà pu da scancrär con l’Udinéz

 

Ninis sìncov : un gran tir e po’ anca par col ragas chi cartlén timbrè e njént äd pu, però al fat l’é ch’ al gh’à déz an’ meno che Marchino e al s’ dovrìss fär su ‘l manghi äd pu

 

Valdes sìncov : Calimero st’ an’ al gh’ à la préza diréta cme un bravo äd trént’ an’ fa, al prìmm modél però, parchè al second al gh’ äva béle al variatór e al gas rapido, invéci chilù l’à mìss su ‘na velocitè che Stefano Bocéli ( n’ätra vécia gloria dal Barbiàn ) a confront al paräva Valentino Rossi

 

Amauri séz : l’é manchè al colp äd grasja, second mi lòmmo a gh’ mancäva col fil äd rabia ch’ a s’ gh’ à cuand l’avarsäri l’é pu important, anca se l’impìggn l’é sémpor stè ezemplär ! A propozit, anca par ti ormäj sarìss siòch  andär via, dato che chi a t’é catè l’ambjént giùsst, e al Pärma l’à catè al bomber d’esperjénsa ch’ l’é tutt òr colè

 

Sansón séz : stavolta al t’é manchè l’istint dal killer, un po’ p’r al discors fat col tò sòcio, s’ agh’  fùss stè al Milan o l’Inter o còjj là äd Torén t’arìss fat gol sicur, e l’é méj acsì t’ al digh mi ! A propozit, fa la ‘na telefonäda ai tò véc’ amigh dal Bayern e digh par marcordì äd fär mìga di schèrs e äd tgnìr la guärdia älta, che pò il bìrri j a sturèmma dopa tutt insèmma s’ a sucéda ch’ la còza là

 

Donadón séz : Mìsster, sénsa infàmja e sénsa lòda cme a s’ dìz, a né gh’ nascond mìga ch’ a m’é dè zò al cór un pär äd volti durant la partìda e a m’ son catè a ronfär cme gnan al Ghiro al sarìss bón ! A tutt il manéri domenica col Don a gh’ tén sémpor in manéra particolära a tacärol, cme a s’ fa con tutt j avarsäri ch’ a sé stìmma un bél po’ donca guärdia älta e AVANTI CROCIATI

(Tgnèmmos vìsst)

(Testo di Crociato 63)

 

(Correzione ortografica a cura di Enrico Maletti)