"Il Pagéli di Crozè in Djalètt Pramzàn". Pärma Sampdoria 0-2. Testo pubblicato sulla Gazzetta di Parma del 20 gennaio 2015.

(Testo in dialetto Parmigiano)

Pärma Sampdoria 0-2

Mirànt sètt : almemo t’è evitè äd tirär fóra al palotolier, do béli parädi e anca un bél color äd màja, có é 'drè rivär la Stabilo Boss cme nóv sponsor ?

Rispoli du : déz par la vlontè, mo sa bastìss còlla li mi sarìss stè titolär fiss con la crozäda adòs par trént’ an', mo a pärta còlla lì, du pè e 'na conisjón ch' a s’ in càta äd molt méj a l’Amorini a San Pancràsi o in Via Pelicéli

Lucaréli du : Capitàn, at' pär un po’ Pinocchio, mìga p'r al näz a gh' mancrìss ätor, mo parchè at' pär fat un po’ äd lèggn in còll perìod chi, lént e intrégh e si ch' at' si mägor cme n’ ùss ! magna un po’ pù äd caval pìsst, a Colècc' ala rotonda i gh' l’àn bón bombén, s’ in t’al pägon mìga chi brasén curt lì dìmmol che cuand a vén fóra da l’ufìssi a t’al vén a portär mi e al magnèmma insìmma ala cärta con do mìcchi äd pan valabén ?

Costa du : cl’Eder e còll Berghessio li i parävon in moto ahn ?? i t’ àn spetnè al ciùff, roba che par 'na tésta cuadra l’é péz che robärgh' ì camperos ; brùtta domenica a bjónd ? dai tén dur valà

Palètta du : du + du + du : a fì séz in trì…. Andèmma bén; anca ti l' òmmo i t’ àn fat vèddor la strja chi du là ! porco mond s’ j andävon fort

Gobbi du : eh Massimo l’é dura st’ an', i van tutt pù fort, i rivon zò chi päron al Bagansa st’ avtón, i pòrton via tutt cuant, e domenica dòpa domenica purtrop is' pòrton via anca tutt il speransi

Nocerino séz : d’incoragiamént p'r un zugadór ch’ al m’é sémpor piazù e anca jerdlà l’ora ch' l’ à zughè second mi l’é stè bräv e inteligént a capir béle i movimént dal so repärt ( va bén che con la velocitè ch’ i van al gh' à tutt al témp äd capirja con cälma )

Palladén zéro : al vót al diz tutt : zéro, al fa pärdor fin la vója äd färogh 'na pagéla spiritóza, un po’ cme tùtta cla maledètta stagjón chi, 'na tristèssa ùnnica cme i sò selfie con Moggi, i sò salut afetvóz con i tifóz ädla juve a Turén o i tweet d’amor p'r al Napoli ! se mäj as' catìss dabón un cualchidón ch' a s’al porta a ca' mo l’é la solita speransa di mälvestì ch' a faga un bón invèron

Lodi du : do partidi discréti, un fógh äd pàja e po’ al pär béle artornè in-t-la sòvva : velocitè da Carlo Sassi e Eron Vitaletti ( par chi as' l’arcòrda, par chi l’é pù giòvvon andì dai vòstor véc' a dmandär ch' j’éron )

Mariga : séz : un vót par salutär al boomerang crozè : gira e rigira l’artórna sémp'r indrè ! va bén tutt mo s’andèmma avanti a fär al marchè acsì, as' podèmma spetär che prìmma ädla fén äd Znär i fàgon al cartlén anca a Tino, che sicur al sarà a “parametro zero”

Mauri cuàtor : tirè in bas anca lù dala tristèssa generäla, fòrsi la pù brùtta partìda da cuand l’é titolär, second mi al s’é béle fiachè äd còrror par tutt e po’ ciapär du o tri gol tutt il fésti

Bidaoui cuàtor : se non ätor a gh' l'à mètta tùtta, mo cuand a gh’é da tirär fóra la conisjón dal cavàgn bón’na not sonadór, in-t-n' ocazjón l’à fat n’asjón strepitóza e po’ al gh’ äva da fär n’apog' semplicìssim e mandär in porta al so compagn e invéci al s’é ravojè su da lù cme un bégh e ciao

Casàn du : inezistént ; da Fantantonio a son sincér am' sariss spetè un partidón invéci l’à tirè fóra 'na partidasa, ch’ l'à Sampdoria li insòmma la t' fa bàtor al cór fort bombén ! e va bé l’é 'na còza umana, l’important l’é domenica ! al Cesena, m’arcmànd, domenica at' gh’é da ciapär la scuädra par man e vénsor la partìda da ti ! forza Antonio ch' l’é cuäzi imposìbbil, mo cuäzi !

Donadón dù : Mìsster purtrop il scùzi j’én fnidi, l’é véra chi gh' àn dè 'na róza ch’ a 'n so mìga s' l' as' sälva in sèria B, l’é véra ch’ a gh’i tutt äd nóv a ciapär al stipendi, l’é anca véra ch' a gh’é di ragas in-t-i call center ch'a viva con 500 euro al méz e anca äd la génta sénsa lavór, donca almeno un po’ pù äd grénta e orgój a j à vrìss vèddor ! sionò s’a 'n sé gh' la cäva pù, basta 'na parola : dimisjón e di ch'a gh' pénsa renato zero e brignano a fär la scuädra ! AVANTI CROCIATI

Tgnèmmos vìsst

(Testo di Crociato 63)

(Correzione ortografica a cura di Enrico Maletti)